நெத்தியடி !

மாசற்ற காற்றுப் பாற்றாக்குறையைப்போல 

மாசில்லா அன்பும் இன்று பற்றாக்குறைதான்.

இறையன்பும், தேவ அன்பும் பெயரிலே தான் இருக்கிறது,

புகைப்படச்சான்று: EMS World.com

எதிர்பாலர்மேல் வருவதே அன்பு என்று இலக்கணமான இன்று,

எதிர்பார்ப்பில்லாமல் வருவதே அன்பு என்று இலக்கணம் வகுத்தவர் 

எம்பெருமான் இயேசு கிறிஸ்து ஒருவரே.

அவர் வாழ்ந்த காலத்தில், 

மக்களுக்குப் போதித்துக் கொண்டிருக்கும்போது 

விபச்சாரப் பெண் ஒருத்தியை 

கையும், மெய்யுமாகப் பிடித்து விட்டோம் எனத்

தண்டிக்கச் சொல்லி தாண்டவம் ஆடினர் ஒரு கூட்டமக்கள். 

தாம் மாட்டிக்கொண்டால் வக்கீலாவதும், 

பிறர் மாட்டிக்கொண்டால் நீதிபதியாவதும் இயல்புதானே !

இன்றுமட்டுமல்ல, அன்றும் இதே தான் நிலை.

உத்தம புத்திரராகவும், ஒழுக்க சீலர்களாகவும் 

வேஷம்போட்ட மாயக்கூட்டம் கோஷம்போட்டது.

கல்லெறிஞ்சு சாகடிக்க கூட்டம்கூடி கும்மரிச்சம் போட்டது.

புகைப்படச்சான்று: ArcheryGermany.co.uk

கருணைக்கடவுளோ, தரையில் குனிந்து விரலால் எழுதினார்.

அவர்களோ, ஓயாத கடல் அலையாய் இரைச்சலிட்டுக் 

கொடூரமாகக் கொல்லச்சொல்லி கூச்சலிட்டனர்.

நிமிர்ந்து பார்த்த இயேசுபிரான்

நின்ற மக்களைப்பார்த்து,

"உங்களில் தப்பில்லாத உத்தமன் முதல் கல்லை 

இவள் மேல் எறியுங்கள்" என்றார்.

புகைப்படச்சான்று: The Sports Rush

சுத்திவளைச்சு பேசாமல் 

சுத்தியல் வச்சு நெத்தியில் அடிச்ச மாதிரி 

ஒரே அடி, நெத்தி அடி.

ஒரே ஒரு கல்லுதான், அதுவும் பாறாங்கல்லு!

அவங்ககிட்ட சொன்னது கடவுளாச்சே,

அவங்க சொந்த மனசும் குத்திருச்சே!

ஒரே ஒரு கல்லாய், தாவீது அடித்த கூழாங்கல்லாய். . .

கொலைவெறி பிடித்த அந்த கோலியாத்துகள் 

சிட்டாய்ப் பறந்தனர், சட்டெனக் கலைந்தனர்!

இரண்டாம் முறை நிமிர்ந்து பார்த்த இயேசு நாதர்,

பெண்ணே, "உன்னைக் கொல்ல வந்த ஒருத்தனுமில்லையோ?" எனக் கேட்க,

அவளோ, "இல்லை ஆண்டவரே" என்றாள்.

இரக்கக் கடல், கிருபைக் களஞ்சியம்,

கருணை மூர்த்தி இயேசு கிறிஸ்து 

நம்மை நியாயம் தீர்க்க அல்ல,

மீட்க வந்த இரட்சகர் அல்லவா,

எனவே, கருணையோடு சொன்னார்,

நானும் உன்னை நியாயம் தீர்ப்பதில்லை!

"நீ போ, இனி பாவம் செய்யதே என்றார்!"

புகைப்படச்சான்று : Mind 4 Survival.com

அவளை, நிந்தனை செய்து தீர்ப்பிடவில்லை.

மாறாக, சிந்தனை செய்ய நெஞ்சுருகப் பேசினார்.

அந்த தரமான வார்த்தைகளே, 

தண்டனையை விட தாக்கத்தை ஏற்படுத்தியது.

சாவுக்கு அஞ்சி அதன் விளிம்பில் நின்றவளை 

வாழ்வுக்குத் திருப்பினார் இயேசு இரட்சகர்.

அன்று தீர்ப்பிடாதவர், என்றும் தீர்ப்பிடுவதில்லையா?

இது தான் தப்பு கணக்கு. . . 

புகைப்படச்சான்று: Meme Center

விபச்சாரப் பெண்ணை மன்னித்து மறுவாழ்வு கொடுத்த இறைவன் 

நாம் எந்நிலையில் இருந்தாலும் நம்மையும் 

மன்னித்து ஏற்கத் தயாராக உள்ளார்.

ஆனால்,அன்று அவர் இரட்சகராக வந்தார்;

மீண்டும் அவர் நீதிஅரசராக வருவார்.

"நெத்தியடி"யாக அவர் நமக்கு உரைப்பது 

"நீ போ இனி பாவம் செய்யாதே" என்பதே!

புகைப்படச்சான்று: iStockPhoto.Com

("நெத்தியடி!" என்ற தலைப்பில் எழுதப்பட்ட இந்த வரிகள், 'ஆர்வமிக்க அன்பர்களின் ஐக்கியம்' மூலம் நடத்தப்படும் குறுநேர மெய்நிகர் வாராந்திர கூடுகைக்காக எழுதப்பட்டு, 29.09.2020ல் அக்கூடுகையில் வாசிக்கப்பட்டது. யாவரையும் ஊக்கப்படுத்துவதற்காக 'ஆர்வமிக்க அன்பர்களின் ஐக்கியம்' எடுக்கும் இந்த முயற்சிக்கு நெஞ்சார்ந்த நன்றிகள்.)